பிரித்தானியாவின் முதல் பில்லியனர் விளையாட்டு வீரரானார் டேவிட் பெக்கம்

இங்கிலாந்து கால்பந்து அணியின் முன்னாள் தலைவர் சேர் டேவிட் பெக்கம், 2026 ஆம் ஆண்டிற்கான ‘சண்டே டைம்ஸ்’ செல்வந்தர்கள் பட்டியலில் பிரித்தானியாவின் முதலாவது பில்லியனர் விளையாட்டு வீரராக உருவெடுத்துள்ளார்.

டேவிட் பெக்கம் மற்றும் அவரது மனைவி விக்டோரியா பெக்கம் ஆகியோரின் கூட்டுச் சொத்து மதிப்பு 1.185 பில்லியன் பவுண்டுகளை எட்டியுள்ளதாக இப்பட்டியல் தெரிவிக்கின்றது.

அமெரிக்காவின் ‘இன்டர் மியாமி’ கால்பந்து அணியின் இணை உரிமையாளராக பெக்கம் உள்ளார். இந்த அணி தற்போது 1.45 பில்லியன் டொலர் மதிப்பைக் கொண்ட மிக முக்கியமான அணியாகக் கருதப்படுகின்றது. அத்துடன், அடிடாஸ் மற்றும் ஹியூகோ பாஸ் போன்ற சர்வதேச நிறுவனங்களின் தூதுவராகவும் அவர் செயற்பட்டு வருகின்றார்.

இவருடைய மனைவி விக்டோரியா பெக்கமின் ஆடை வடிவமைப்பு நிறுவனம் ஊடாகப் பாரிய வருமானம் ஈட்டப்பட்டுள்ளது.

விளையாட்டுத் துறையைச் சார்ந்த பெரும் செல்வந்தர்கள் வரிசையில் பெக்கம் தம்பதியினர் இரண்டாம் இடத்தில் உள்ளனர்.

• பெர்னி எக்லெஸ்டோன்: முன்னாள் போர்முலா 1 (F1) தலைவர் – 2 பில்லியன் பவுண்டுகள் (முதலிடம்).
• லூயிஸ் ஹாமில்டன்: 7 முறை F1 சாம்பியன் – 435 மில்லியன் பவுண்டுகள் (5-வது இடம்)
• ரோரி மெக்ரோய்: கோல்ப் வீரர் – 325 மில்லியன் பவுண்டுகள் (7-வது இடம்)
• அந்தோணி ஜோசுவா: குத்துச்சண்டை வீரர் – 240 மில்லியன் பவுண்டுகள் (8-வது இடம்)
• ஹரி கேன் மற்றும் ஆண்டி முர்ரே: தலா 110 மில்லியன் பவுண்டுகள் (10-வது இடம்)

விளையாட்டுப் போட்டி விளம்பரதாரர்களான பாரி ஹியர்ன் மற்றும் எடி ஹியர்ன் ஆகியோர் 1.035 பில்லியன் பவுண்டுகள் சொத்து மதிப்புடன் பில்லியனர் பட்டியலில் இணைந்துள்ளனர்.

மென்செஸ்டர் யுனைடெட் அணியின் இணை உரிமையாளரான சர் ஜிம் ரட்க்ளிஃப் சொத்து மதிப்பு 1.85 பில்லியன் பவுண்டுகளால் குறைந்து 15.194 பில்லியன் பவுண்டுகளாக வீழ்ச்சியடைந்துள்ளது. இதனால் ஒட்டுமொத்த செல்வந்தர் பட்டியலில் அவர் ஏழாவது இடத்திலிருந்து ஒன்பதாவது இடத்திற்குத் தள்ளப்பட்டுள்ளார்.

சமீபத்தில் சேர் பட்டம் வழங்கி கௌரவிக்கப்பட்ட 51 வயதான டேவிட் பெக்கம், விளையாட்டு மற்றும் வர்த்தகத் துறையில் புதிய மைல்கல்லை எட்டியுள்ளமை குறிப்பிடத்தக்கது.