சுகாதாரம் மற்றும் ஊடகத் துறைகளின் மேம்பாட்டுக்கு தென் கொரியாவின் தொடர்ச்சியான ஆதரவு
கொரிய ஜனநாயக குடியரசு (தென் கொரியா), இலங்கையின் சுகாதார மற்றும் ஊடகத் துறைகளின் எதிர்கால முன்னேற்றத்திற்குத் தொடர்ந்து ஆதரவு வழங்குவதோடு, மானிய உதவிகள் மற்றும் பல்வேறு அபிவிருத்தி திட்டங்களையும் வழங்கத் தயாராக இருப்பதாக அறிவித்துள்ளது.
இந்த விடயத்தை இலங்கையில் உள்ள தென் கொரிய தூதுவர் மியோன் லீ (Miyon Lee) நேற்று (16) சுகாதார மற்றும் ஊடக அமைச்சில் நடைபெற்ற சந்திப்பின் போது தெரிவித்தார். அவர் சுகாதார மற்றும் ஊடக அமைச்சர் வைத்தியர் நளிந்த ஜயதிஸ்ஸ அவர்களைச் சந்தித்து கலந்துரையாடினார்.
சுகாதாரத் துறையின் முன்னேற்றத்திற்காக கொரியா ஒரு நீண்டகால நெருங்கிய நட்பு நாடாக இருந்து வருவதாகவும், KOFIH, KOICA மற்றும் EDCF போன்ற நிறுவனங்கள் மூலம் இலங்கையின் சுகாதார துறைக்கு முக்கியமான திட்டங்களை நிறைவேற்றியுள்ளதாகவும் அமைச்சர் இச்சந்திப்பில் குறிப்பிட்டார்.
மேலும், கொரிய அரசாங்கத்துடன் நடைபெறும் ஒத்துழைப்புகள் மிகவும் திறமையானதும் சீரானதும் ஆக இருப்பதாகவும், இதன் மூலம் சுகாதாரத் துறையில் சிறந்த பலன்களைப் பெற முடிந்துள்ளதாகவும் அவர் தெரிவித்தார். சுகாதாரம், கல்வி, டிஜிட்டல் மயமாக்கல் மற்றும் திடக் கழிவு மேலாண்மை உள்ளிட்ட துறைகளில் கொரியாவின் தொடர்ந்த ஆதரவுக்கு அவர் நன்றி தெரிவித்தார்.
தென் கொரிய தூதுவர் மியோன் லீ, இலங்கையின் சுகாதாரத் துறைக்கு தொடர்ந்தும் ஆதரவு வழங்குவதாக உறுதியளித்ததுடன், நடப்பில் உள்ள திட்டங்களின் முன்னேற்றம் குறித்தும் திருப்தி தெரிவித்தார்.
அவர் மேலும் கொரியா சர்வதேச சுகாதார சேவை நிறுவனம் (KOFIH) மூலம் செயல்படுத்தப்படும் உயிர் மருத்துவ பொறியியல் சேவை மேம்பாட்டு திட்டம் உள்ளிட்ட பல்வேறு திட்டங்கள் குறித்து விரிவாக விளக்கினார்.
மேலும், இலங்கையின் ஊடகத் துறையின் எதிர்கால முன்னேற்றத்திற்கும் கொரியா ஆதரவு வழங்கத் தயாராக இருப்பதாகவும் அவர் தெரிவித்தார். இலங்கை ஒரு அழகிய நாடு எனக் குறிப்பிட்ட அவர், கண்டி தந்ததாதுகோயில் மற்றும் சிகிரியா போன்ற இடங்கள் கொரிய சுற்றுலாப் பயணிகளிடையே மிகவும் பிரபலமானவை எனவும் கூறினார்.
இந்த சந்திப்பில் சுகாதார அமைச்சின் செயலாளர் விசேட வைத்தியர் அனில் ஜாசிங்க, கூடுதல் செயலாளர்கள் ஜனக கித்சிரி குணவர்தன, சாலிந்த பண்டார, கே.பி. யோகசந்திர, உயிர் மருத்துவத் துறை துணை இயக்குநர் ஜெனரல் எஸ்.எஸ்.எல். ஹேரத், மற்றும் KOFIH அமைப்பின் பொதுச் செயலாளர் குவான் பேக்-பேக் (Kwan Baek-Baek) உள்ளிட்ட பலர் கலந்து கொண்டனர்.
