சுற்றுலாத்துறை பிரதி அமைச்சர் பேராசிரியர் ருவன் ரணசிங்கவுக்கு SITF Eminent Tourism Pioneer Award 2026 விருது
தென் கொரியாவின் சியோல் நகரில் நேற்று (04) நடைபெற்ற 41ஆவது Seoul International Travel Fair (SITF) நிகழ்வில், இலங்கையின் சுற்றுலாத்துறை பிரதி அமைச்சர் Prof. Ruwan Ranasinghe அவர்களுக்கு மதிப்புமிக்க 2026 SITF Eminent Tourism Pioneer Award விருது வழங்கப்பட்டது.
சுற்றுலாத்துறையில் கல்வி ஆய்வுகள் மற்றும் தொழில்துறை பங்களிப்புகள் மூலம் சிறப்பான சேவைகளை வழங்கியவர்களை கௌரவிக்கும் நோக்கில், SITF சுற்றுலா விருது குழுவினால் மேற்கொள்ளப்பட்ட கடுமையான மதிப்பீட்டு செயல்முறையின் பின்னர் இந்த விருது வழங்கப்படுகிறது.
இந்த ஆண்டில் தென் கொரியாவைச் சேர்ந்த மூன்று முன்னணி சுற்றுலாத்துறை ஆளுமைகளும், சர்வதேச அளவில் மூன்று முக்கிய நபர்களும் இவ்விருதிற்காகத் தெரிவு செய்யப்பட்டனர். 41 ஆண்டுகால சியோல் சர்வதேச பயணக் கண்காட்சியின் வரலாற்றில் இந்த விருதைப் பெறும் முதல் இலங்கையர் என்ற பெருமையை பேராசிரியர் ருவன் ரணசிங்க பெற்றுள்ளார்.
இந்த விருது, அவருடைய தனிப்பட்ட சாதனைகளை மட்டுமன்றி, உலகளாவிய சுற்றுலாத்துறையில் இலங்கையின் வளர்ந்து வரும் முக்கியத்துவத்தையும் எடுத்துக்காட்டுகிறது. நிலையான சுற்றுலா அபிவிருத்தி, புதுமை, ஆராய்ச்சி மேம்பாடு மற்றும் சர்வதேச ஒத்துழைப்பு ஆகிய துறைகளில் இலங்கை காட்டிவரும் அர்ப்பணிப்பையும் இது பிரதிபலிக்கிறது.
விருதைப் பெற்றதையடுத்து கருத்து வெளியிட்ட பேராசிரியர் ருவன் ரணசிங்க, இந்த அங்கீகாரம் தனிப்பட்ட பெருமையாக மட்டுமல்லாது, உலகின் முன்னணி சுற்றுலா இலக்காக இலங்கை உருவெடுத்து வருவதற்கான சான்றாகவும் அமைந்துள்ளது என்றார்.
மேலும், இலங்கையின் சுற்றுலாத்துறையை மேலும் வலுப்படுத்தவும், நாட்டின் தனித்துவமான சுற்றுலா அனுபவங்களை உலக அரங்கில் மேலும் பிரபலப்படுத்தவும் தொடர்ந்து பணியாற்றுவேன் என அவர் உறுதியளித்தார்.
இந்த விருது, சர்வதேச சுற்றுலாத்துறையில் முக்கிய பங்காளியாக இலங்கையை நிலைநிறுத்துவதற்கான நாட்டின் முயற்சிகளுக்கும், உலக சுற்றுலா வளர்ச்சிக்கான கல்வி மற்றும் நடைமுறை பங்களிப்புகளுக்கும் கிடைத்த முக்கிய அங்கீகாரமாகக் கருதப்படுகிறது.
