மின்னல் தாக்கியதால் ஸ்ரீலங்கன் ஏயார்லைன்ஸ் விமானம் அவசரமாக தரையிறக்கம்

கட்டுநாயக்க பண்டாரநாயக்க சர்வதேச விமான நிலையத்திலிருந்து அவுஸ்திரேலியாவின் சிட்னி நோக்கி புறப்பட்ட ஸ்ரீலங்கன் ஏயார்லைன்ஸ் விமானம் மீது மின்னல் தாக்கியதையடுத்து, விமானம் மீண்டும் கட்டுநாயக்க விமான நிலையத்தில் அவசரமாக தரையிறக்கப்பட்டது.

விமான நிலைய அதிகாரிகள் வழங்கிய தகவலின்படி, ஸ்ரீலங்கன் ஏயார்லைன்ஸுக்கு சொந்தமான UL-606 என்ற விமானம் இன்று (12) அதிகாலை 1.00 மணியளவில் சிட்னி நோக்கிப் புறப்பட்டது.

217 பயணிகளுடன் புறப்பட்ட விமானம்

ஏர்பஸ் A330 ரகத்தைச் சேர்ந்த இந்த விமானத்தில் 217 பயணிகளும் 16 பணியாளர்களும் பயணித்திருந்தனர்.

விமானம் புறப்பட்ட நேரத்தில் கட்டுநாயக்க மற்றும் அதனைச் சூழ்ந்த பகுதிகளில் மின்னலுடன் கூடிய கடும் மழைக்காலநிலை நிலவியதாக தெரிவிக்கப்படுகிறது.

மின்னல் தாக்கியதைத் தொடர்ந்து அவசர தரையிறக்கம்

புறப்பட்டு சுமார் 40 நிமிடங்கள் கழித்து விமானத்தின் மீது மின்னல் தாக்கியதாக தெரிவிக்கப்படுகிறது.

இதனையடுத்து, பாதுகாப்பு காரணங்களுக்காக சிட்னி நோக்கிய பயணத்தை தொடராமல் விமானத்தை மீண்டும் கட்டுநாயக்க விமான நிலையத்திற்கு திருப்பிச் செல்ல விமானி தீர்மானித்தார்.

அதன்படி, அதிகாலை 1.40 மணியளவில் விமானம் பாதுகாப்பாக தரையிறக்கப்பட்டது.

மாற்று விமானத்தில் பயணிகள் அனுப்பி வைப்பு

சம்பவத்தையடுத்து, ஸ்ரீலங்கன் ஏயார்லைன்ஸ் நிறுவனம் அதே வகையைச் சேர்ந்த மற்றொரு Airbus A330 விமானத்தை ஏற்பாடு செய்து, பயணிகளை இன்று காலை 6.06 மணியளவில் சிட்னி நோக்கி அனுப்பி வைத்துள்ளது.

தொழில்நுட்ப பரிசோதனைக்கு அனுப்பப்பட்ட விமானம்

மின்னல் தாக்குதலுக்குள்ளான விமானம் மேலதிக தொழில்நுட்ப பரிசோதனைகள் மற்றும் பழுதுபார்ப்பு பணிகளுக்காக கட்டுநாயக்க விமான நிலையத்தில் உள்ள ஸ்ரீலங்கன் ஏயார்லைன்ஸ் பொறியியல் பிரிவுக்கு அனுப்பப்பட்டுள்ளதாக விமான நிலைய அதிகாரிகள் தெரிவித்துள்ளனர்.

இந்தச் சம்பவத்தில் பயணிகள் அல்லது பணியாளர்களுக்கு எந்தவித பாதிப்பும் ஏற்படவில்லை என உறுதிப்படுத்தப்பட்டுள்ளது.