கட்டுநாயக்க விமான நிலையத்தில் 60 இலட்சம் ரூபா பெறுமதியான சிகரெட் கடத்தல் முயற்சி – மூன்று வெளிநாட்டவர்கள் கைது

Bandaranaike International Airport இல் வைத்து சுமார் 60 இலட்சத்து 60 ஆயிரம் ரூபா பெறுமதியான சீனாவில் தயாரிக்கப்பட்ட சிகரெட்டுகளை சட்டவிரோதமாக நாட்டுக்குள் கொண்டு வர முயன்ற மூன்று வெளிநாட்டு வர்த்தகர்கள் நேற்று (25) அதிகாலை சுங்க அதிகாரிகளால் கைது செய்யப்பட்டுள்ளனர்.

கைது செய்யப்பட்டவர்கள் மூவரும் சீனப் பிரஜைகள் என அடையாளம் காணப்பட்டுள்ளனர்.

விமான நிலையத்தின் பயணிகள் வருகை முனையத்தில் சந்தேகத்திற்கிடமான வகையில் நடந்து கொண்ட மூவரையும் சுங்க அதிகாரிகள் சோதனை செய்தபோது, அவர்களிடமிருந்து பெருமளவிலான வெளிநாட்டு உயர்தர சிகரெட்டுகள் மீட்கப்பட்டன.

சோதனையின் போது, பயணப் பொதிகளுக்குள் மிகவும் சூட்சுமமான முறையில் மறைத்து வைக்கப்பட்டிருந்த 202 சிகரெட் கார்ட்டூன்கள் கண்டுபிடிக்கப்பட்டன. அவற்றில் மொத்தம் 40,400 சிகரெட்டுகள் இருந்ததாக சுங்க அதிகாரிகள் தெரிவித்துள்ளனர்.

இவை அனைத்தும் சுமார் 60 இலட்சத்து 60 ஆயிரம் ரூபா பெறுமதியுடையவை என மதிப்பிடப்பட்டுள்ளது.

விசாரணைகளின்படி, சந்தேகநபர்கள் சீனாவில் இருந்து சிகரெட்டுகளை கொள்வனவு செய்து மலேசியாவின் கோலாலம்பூர் வழியாக Bandaranaike International Airportக்கு வந்ததாக தெரியவந்துள்ளது.

அவர்கள் கொண்டு வந்த ஆறு பயணப் பொதிகளிலும் வரி செலுத்த வேண்டிய பொருட்கள் எதுவும் இல்லை எனக் கூறி “கிரீன் சேனல்” வழியாக வெளியேற முயன்றபோதே கைது செய்யப்பட்டதாக தெரிவிக்கப்படுகிறது.

தற்போது மூவரும் சுங்க அதிகாரிகளின் தடுப்புக் காவலில் வைக்கப்பட்டுள்ளதுடன், மேலதிக விசாரணைகள் நடைபெற்று வருகின்றன.