மாகாண சபைத் தேர்தல் குறித்து திறந்த பேச்சுவார்த்தைக்கு தயார் – சாகர காரியவசம்

ஸ்ரீ லங்கா பொதுஜன பெரமுனவின் பொதுச்செயலாளர் சாகர காரியவசம், மாகாண சபைத் தேர்தல் தொடர்பாக அனைத்து தரப்பினருடனும் வெளிப்படையான பேச்சுவார்த்தையில் ஈடுபடத் தயாராக உள்ளதாக தெரிவித்தார்.

மேலும், காணி மற்றும் பொலிஸ் அதிகாரங்களைத் தவிர்த்து ஏனைய அதிகாரங்களை அனைத்து மாகாணங்களுக்கும் பகிர்வதில் தங்களுக்கு எந்தவித பிரச்சினையும் இல்லை என்றும் அவர் குறிப்பிட்டார்.

மாகாண சபைத் தேர்தல் தொடர்பாக கருத்து தெரிவிக்கும்போது, தாங்கள் மாகாண சபைத் தேர்தலை நடத்த வேண்டும் என்ற நிலைப்பாட்டில் உறுதியாக இருப்பதாக அவர் கூறினார்.

யுத்தம் முடிவடைந்த பின்னர் முன்னாள் ஜனாதிபதி மகிந்த ராஜபக்ஷ மாகாண சபைத் தேர்தலை நடத்தியதாகவும், வடக்கு மற்றும் கிழக்கு மாகாணங்களில் தோல்வியடைவது உறுதி என்பதை அறிந்திருந்தபோதும் தேர்தலை நடத்தினார் என்றும் அவர் தெரிவித்தார்.

அதன் மூலம் அரசியலமைப்பின் அடிப்படையில் வடக்கு மற்றும் கிழக்கு மக்களுக்கு நிர்வாகத் தலைமைத்துவ உரிமை வழங்கப்பட்டதாகவும் அவர் கூறினார்.

ஆனால், பின்னர் ஆட்சிக்கு வந்த நல்லாட்சி அரசாங்கம் அந்த அரசியல் உரிமைகளை பாதுகாக்கத் தவறிவிட்டதாக அவர் குற்றஞ்சாட்டினார்.

2017 ஆம் ஆண்டு எல்லை நிர்ணய அறிக்கையின் மூலம் மாகாண சபைத் தேர்தலை நெருக்கடிக்குள்ளாக்கி, அதை காலவரையறையின்றி பிற்போட நல்லாட்சி அரசாங்கம் நடவடிக்கை எடுத்ததாகவும், அதற்கு தமிழ் தேசிய கூட்டமைப்பு மற்றும் மக்கள் விடுதலை முன்னணி முழுமையான ஒத்துழைப்பை வழங்கியதாகவும் அவர் கூறினார்.

தேர்தல் முறைமையில் ஏற்பட்ட சட்ட சிக்கல்களே மாகாண சபைத் தேர்தல் நீண்டகாலமாக ஒத்திவைக்கப்பட்டதற்கான காரணம் என்றும் அவர் குறிப்பிட்டார்.

இந்நிலையில், எந்த தேர்தல் முறைமையின் கீழ் மாகாண சபைத் தேர்தலை நடத்துவது குறித்து ஆராய்ந்து அறிக்கை சமர்ப்பிக்க பாராளுமன்ற விசேட குழு ஒன்று நியமிக்கப்பட்டுள்ளதாகவும் தெரிவித்தார்.

அக்குழு மூன்று மாதங்களுக்குள் அறிக்கை சமர்ப்பிக்க வேண்டும் என்று கூறப்பட்டிருந்தாலும், அந்த காலக்கெடுவுக்குள் அறிக்கை சமர்ப்பிக்கப்படும் என்ற நம்பிக்கை தமக்கு இல்லை என்றும் அவர் கூறினார்.

மேலும், மாகாண சபைத் தேர்தல் தொடர்பாக அனைத்து தரப்பினருடனும் திறந்த மற்றும் வெளிப்படையான கலந்துரையாடல்களுக்கு தாங்கள் தயாராக இருப்பதாக அவர் மீண்டும் வலியுறுத்தினார்.

காணி மற்றும் பொலிஸ் அதிகாரங்களைத் தவிர்த்து ஏனைய அதிகாரங்களை அனைத்து மாகாணங்களுக்கும் பகிர்ந்தளிப்பதில் எந்த எதிர்ப்பும் இல்லை என்றாலும், அரசியலமைப்பின் 13ஆவது திருத்தத்தின்படி காணி மற்றும் பொலிஸ் அதிகாரங்களை பகிர்ந்தளிப்பது நாட்டில் தேவையற்ற பிரச்சினைகளை உருவாக்கும் என்றும் அவர் தெரிவித்தார்.

மாகாண சபைத் தேர்தலின் மூலம் நாட்டின் அடிப்படை பிரச்சினைகளுக்கு தீர்வு காண வேண்டும் என்ற நிலைப்பாட்டில் தாங்கள் உறுதியாக உள்ளதாகவும் சாகர காரியவசம் கூறினார்.