கடல் வளப் பாதுகாப்புக்கு சர்வதேச கூட்டு நடவடிக்கை அவசியம் – டோக்கியோவில் அமைச்சர் இராமலிங்கம் சந்திரசேகர்
ஜப்பானின் டோக்கியோ நகரில் ஜூன் 2 முதல் 4 வரை நடைபெற்ற தீவு நாடுகளின் பெருங்கடல் உச்சி மாநாட்டில் இலங்கையை பிரதிநிதித்துவப்படுத்தி கலந்து கொண்ட நீர்வாழ் மற்றும் பெருங்கடல் வளங்கள் அமைச்சர் R. Chandrasekar, கடல் வளப் பாதுகாப்புக்கு சர்வதேச அளவில் பலத்த கூட்டு நடவடிக்கை அவசியம் என வலியுறுத்தியுள்ளார்.
சுமார் 35 நாடுகளைச் சேர்ந்த அரச தலைவர்கள், மீன்பிடி அமைச்சர்கள் மற்றும் உயர்மட்ட அதிகாரிகள் கலந்து கொண்ட இந்த மாநாட்டில் ஜப்பான் பேரரசர் நருஹித்தோ, நோர்வே இளவரசர் ஹாகோன் மற்றும் ஜப்பான் பிரதமர் உள்ளிட்ட பலர் பங்கேற்றனர்.
மாநாட்டில் உரையாற்றிய அமைச்சர் சந்திரசேகர், சிக்கலான கடல்சார் பிரச்சினைகளை எந்த ஒரு நாடும் தனியாக சமாளிக்க முடியாது என தெரிவித்தார்.
அவர் மேலும் கூறுகையில், காலநிலை மாற்றம், கடல் மாசுபாடு, அதிக மீன்பிடி நடவடிக்கைகள் மற்றும் கடல் உயிரியல் பல்வகைமையின் வேகமான அழிவு போன்ற பிரச்சினைகளுக்கு சர்வதேச ஒருங்கிணைந்த நடவடிக்கை அவசியம் என்றார்.
வெறும் வாக்குறுதிகள் அல்லாமல், நடைமுறை நடவடிக்கைகள் மூலம் மட்டுமே தீவு நாடுகள் எதிர்கொள்ளும் சவால்களை சமாளிக்க முடியும் எனவும் அவர் வலியுறுத்தினார்.
வளர்ந்து வரும் தீவு நாடுகளுக்கு நவீன மீன்பிடி தொழில்நுட்பங்கள், செயற்கைக்கோள் கண்காணிப்பு அமைப்புகள் மற்றும் தரவு பகிர்வு வலைப்பின்னல்கள் போன்ற உதவிகளை வழங்க வேண்டும் என்றும் அவர் கோரிக்கை விடுத்தார்.
மேலும் இலங்கையின் “நீலப் பொருளாதாரம்” மற்றும் அறிவியல் அடிப்படையிலான மீன்பிடி மேலாண்மை கொள்கைகள் தற்போது நடைமுறைப்படுத்தப்பட்டு வருவதாகவும் அவர் குறிப்பிட்டார்.
அரசாங்கம் கடல் பாசி காடுகள், பவளப் பாறைகள் மற்றும் கடல் புல்வெளி பகுதிகளை பாதுகாப்பதற்கு முன்னுரிமை அளித்துள்ளதாகவும் தெரிவித்தார்.
நிலையான கடல் வள மேலாண்மையில் மீனவர்கள், கடலோர இளைஞர்கள் மற்றும் பெண்களை முக்கிய பங்காளிகளாக இணைத்து அவர்களை வலுப்படுத்த வேண்டும் எனவும் அமைச்சர் வலியுறுத்தினார்.
இந்த விஜயத்தின் மூலம் ஜப்பான் மற்றும் பிற தீவு நாடுகளுடன் கடல் வளத் துறையில் புதிய தொழில்நுட்ப மற்றும் நிதி ஒத்துழைப்புக்கான வாய்ப்புகள் உருவாகியுள்ளதாக அமைச்சு தெரிவித்துள்ளது.
