முன்பள்ளிக் கல்வி குழந்தையின் எதிர்காலக் கல்விப் பயணத்தில் முக்கிய மைல்கல் – பிரதமர் ஹரிணி அமரசூரிய

ஒரு குழந்தையின் எதிர்காலக் கல்விப் பயணத்தைத் தீர்மானிக்கும் மிக முக்கியமான மைல்கல்லாக முன்பள்ளிக் கல்வி அமைந்துள்ளதாக கல்வி, உயர்கல்வி மற்றும் தொழில்சார் கல்வி அமைச்சரும் பிரதமருமான ஹரிணி அமரசூரிய தெரிவித்துள்ளார்.

அவர் மேலும் கூறியதாவது, முன்பள்ளிக் கல்வியின் தரத்தை உறுதிப்படுத்தும் பொறுப்பு அரசாங்கத்தின் பொறுப்பாகும் என்றும், அனைத்து மாகாணங்களையும் உள்ளடக்கும் வகையில் முன்பள்ளிக் கல்வி நடவடிக்கைகள் சரியான கண்காணிப்பிற்கு உட்படுத்தப்பட வேண்டும் என்றும் வலியுறுத்தினார்.

குருநாகல் மாவட்டத்தில் நடைபெற்ற கல்வி கண்காணிப்பு விஜயத்தின் போது, வெள்ளிக்கிழமை (05) குருநாகல் மாகாண சபை கேட்போர் கூடத்தில் நடைபெற்ற வடமேல் மாகாண முன்பள்ளி ஆசிரியர் பயிற்சி நிலையத்தின் 2023/2024 ஆம் ஆண்டிற்கான டிப்ளோமாதாரிகளுக்குச் சான்றிதழ் வழங்கும் நிகழ்வில் கலந்து கொண்டு உரையாற்றும்போதே அவர் இதனைத் தெரிவித்தார்.

இந்த நிகழ்வு, முன்பள்ளிக் கல்வி அபிவிருத்தி அதிகாரசபையும் மாகாண சபையும் இணைந்து ஏற்பாடு செய்திருந்தது. வடமேல் மாகாணத்தில் முன்பள்ளிக் கல்வியை மேம்படுத்தும் நோக்கில் நிறுவப்பட்ட முக்கிய அரச பயிற்சி நிலையமாக இந்த ஆசிரியர் பயிற்சி கலாசாலை செயற்படுகிறது.

நிகழ்வில் கலந்துகொண்ட அதிகாரிகள், ஆரம்பக் குழந்தை வளர்ச்சி தொடர்பான அரசாங்கத்தின் நிலைப்பாட்டை புதிய டிப்ளோமாதாரிகளுக்கு விளக்கினர்.

பிரதமர் உரையாற்றுகையில் கூறியதாவது:

• எதிர்காலத்தில் முன்பள்ளிக் கல்வியில் நிலைத்தன்மையை உருவாக்க நடவடிக்கை எடுக்கப்படும்
• தேசிய கல்வி ஆணைக்குழு, பெண்கள் மற்றும் சிறுவர் விவகார அமைச்சு மற்றும் கல்வி அமைச்சு இணைந்து கொள்கைகள், பயிற்சி தரநிலைகள் மற்றும் கண்காணிப்பு விதிமுறைகளை உருவாக்கி வருகின்றன
• இந்த ஆண்டிலேயே முன்பள்ளி ஆசிரியர் பயிற்சி திட்டங்கள் ஆரம்பிக்கப்படவுள்ளன
• 2027 ஆம் ஆண்டளவில் நாடளாவிய ஒரே மாதிரியான முன்பள்ளிப் பாடத்திட்டம் நடைமுறைப்படுத்தப்படும்

மேலும், முன்பள்ளிக் கல்வி குறித்து சமூகத்தில் சரியான புரிதலை உருவாக்குவது அவசியம் எனவும் அவர் குறிப்பிட்டார்.

குழந்தையின் ஆரம்பக் கல்விக்கான வலுவான அடித்தளத்தை உருவாக்குவதே முன்பள்ளிக் கல்வியின் நோக்கம் என்றும், வயதுக்கேற்ற இயக்கத் திறன்கள் மற்றும் அடிப்படை திறன்களை வளர்ப்பதே முக்கியம் என்றும் பிரதமர் தெரிவித்தார்.

பெற்றோர்களும் பெரியவர்களும் குழந்தைகளுக்கு தேவையற்ற கல்விச்சுமையை ஏற்படுத்தாமல், அவர்களின் வளர்ச்சிக்கேற்ற சூழலை உருவாக்க வேண்டும் எனவும் அவர் வலியுறுத்தினார். முன்பள்ளி ஆசிரியர்கள் இந்தக் கல்வியின் உண்மையான நோக்கத்தை சமூகத்திற்கு எடுத்துரைப்பதில் முக்கிய பங்கு வகிக்க வேண்டும் என்றும் அவர் கூறினார்.

இந்த நிகழ்வில் வடமேல் மாகாண ஆளுநர் திஸ்ஸ வர்ணகுலசூரிய, பெண்கள் மற்றும் சிறுவர் விவகார பிரதி அமைச்சர் நாமல் சுதர்சன, நாடாளுமன்ற உறுப்பினர்கள், மாகாண அதிகாரிகள் உள்ளிட்ட பலர் கலந்து கொண்டனர்.