அமெரிக்காவின் புதிய வரிக் கொள்கைகளால் நாடு கடுமையான பொருளாதார நெருக்கடியில் – கலாநிதி ஹர்ஷ டி சில்வா

உள்நாட்டில் அமெரிக்க டொலர் பற்றாக்குறை மற்றும் அமெரிக்காவின் புதிய வரிக் கொள்கைகளின் தாக்கம் காரணமாக இலங்கை கடுமையான பொருளாதார நெருக்கடிக்குள் தள்ளப்பட்டுள்ளதாக ஐக்கிய மக்கள் சக்தியின் பாராளுமன்ற உறுப்பினர் ஹர்ஷ டி சில்வா தெரிவித்துள்ளார்.

வெள்ளிக்கிழமை (05) கொழும்பில் ஊடகங்களுக்கு கருத்து தெரிவிக்கையில் அவர் கூறியதாவது:

“நாட்டின் தற்போதைய பொருளாதார நிலைமை சாதகமானதாக இல்லை. நிலைமை மிகவும் தீவிரமாக உள்ளது. தற்போது அமெரிக்க டொலரின் பெறுமதி ரூ.341 ஆக உயர்ந்துள்ளது. கறுப்புச் சந்தையில் அது ரூ.345-ஐத் தாண்டி விற்பனையாகிறது. இது அரசாங்கத்தின் மீதான மக்களின் நம்பிக்கை படிப்படியாகக் குறைந்து வருவதைக் காட்டுகிறது.

சந்தை என்பது நம்பிக்கையை அடிப்படையாகக் கொண்டு இயங்குகிறது. அந்த நம்பிக்கை சிதையும் போது சந்தையும் பாதிக்கப்படுகிறது. வட்டி விகிதங்களை உயர்த்தியதன் மூலம் சில நாட்களுக்கு நிலைமை கட்டுப்படுத்தப்பட்டாலும், தற்போது ரூபாயின் பெறுமதி மீண்டும் வீழ்ச்சியடையத் தொடங்கியுள்ளது.

இதற்கு பல காரணங்கள் உள்ளன. குறுகிய கால அடிப்படையில் திறக்கப்பட்ட கடன் கடிதங்களுக்கான (Letters of Credit) தொகைகளை வங்கிகள் விரைவில் செலுத்த வேண்டியுள்ளது. இதற்குத் தேவையான டொலர் இருப்பு அவசியமாகிறது.

மேலும், வெளிநாடுகளில் வாழும் இலங்கையர்கள் ரூபாயின் பெறுமதி மேலும் குறையலாம் என்ற எதிர்பார்ப்பில் பணத்தை அனுப்புவதை தாமதப்படுத்தி வருகின்றனர். அதேபோல் ஏற்றுமதியாளர்களும் தங்களது வருவாயை நாட்டிற்குள் கொண்டு வராமல் வைத்திருக்கின்றனர்.

ரூபாயின் பெறுமதியை அரசாங்கத்தால் சரியாக நிர்வகிக்க முடியும் என்ற நம்பிக்கை பலரிடமும் குறைந்திருப்பதே இதற்குக் காரணமாகும்.

உலகளாவிய போர் சூழ்நிலை போன்ற காரணிகளும் இலங்கையை பாதித்துள்ளன. குறிப்பாக அமெரிக்க ஜனாதிபதி டொனால்ட் டிரம்ப் அறிமுகப்படுத்தியுள்ள புதிய கொள்கைகளால் இலங்கைக்கு மேலதிக 2.5 சதவீத வரி விதிக்கப்படும் அபாயம் உருவாகியுள்ளது.

பல நாடுகள் அமெரிக்காவுடன் பரஸ்பர ஒப்பந்தங்களை மேற்கொண்டு இந்த பாதிப்பிலிருந்து தப்பித்துள்ளன. இலங்கையும் அமெரிக்காவுடன் பேச்சுவார்த்தை நடத்தும் என கூறப்பட்டாலும் இதுவரை குறிப்பிடத்தக்க முன்னேற்றம் எதுவும் ஏற்படவில்லை.

அரசாங்கம் வெறும் பேச்சுக்களுடன் நிற்காமல், அமெரிக்காவுடன் முறையான பேச்சுவார்த்தைகளை நடத்தி பொருளாதார ஒப்பந்தங்களை மேற்கொண்டு, வரவிருக்கும் கூடுதல் வரிகளில் இருந்து நாட்டைப் பாதுகாக்க வேண்டும்.

டொலரின் பெறுமதி உயரும்போது நாட்டிலுள்ள அனைத்துப் பொருட்களின் விலைகளும் அதிகரிக்கும். பொருளாதாரத்தை நிர்வகிப்பதில் உள்ள சவால்களை தற்போதைய ஜனாதிபதி அனுர குமார திசாநாயக்க நிச்சயமாக புரிந்திருப்பார். நிதியமைச்சகம் இந்த விவகாரத்தை சாதாரணமாக கையாள்வது போல தோன்றினாலும், உண்மையில் நிலைமை மிகவும் சவாலானதாக உள்ளது” என்றார்.