மல்வானை வீடு தொடர்பில் மாணவர்களுடன் மோதலுக்கு செல்லமாட்டோம் – மஹிந்த ஜயசிங்க
மஹிந்த ஜயசிங்க, அனைத்து பல்கலைக்கழக மாணவர்கள் கைப்பற்றி இருக்கும் மல்வானை வீட்டுச் சம்பவம் தொடர்பில் மாணவர்களுடன் மோதலுக்கு செல்லாமல், அமைதியான முறையில் தீர்வு காண முயற்சித்து வருவதாக தெரிவித்துள்ளார்.
அரச சொத்தாக நீதிமன்றத்தால் அறிவிக்கப்பட்டிருக்கும் மல்வானை வீடு, அனைத்து பல்கலைக்கழக மாணவர் ஒன்றியம் உறுப்பினர்களால் கைப்பற்றப்பட்டிருக்கும் சம்பவம் தொடர்பில் ஊடகங்களுக்கு கருத்து தெரிவிக்கையிலேயே அவர் இதனை குறிப்பிட்டார்.
அவர் மேலும் தெரிவிக்கையில், யாரும் உரிமை கோராமல் நீண்டகாலமாக இருந்த மல்வானை வீட்டை மாணவர்கள் கைப்பற்றியுள்ளதாக தெரியவந்துள்ளது.
இந்த விவகாரம் தொடர்பில் கல்வி அமைச்சு, குறித்த வீட்டிற்கு பொறுப்பான பிரதேச செயலாளர் மற்றும் சம்பந்தப்பட்ட அதிகாரிகளுடன் கலந்துரையாடப்பட்டு வருவதாகவும், விரைவில் இதற்கு தீர்வு காண எதிர்பார்ப்பதாகவும் தெரிவித்தார்.
மல்வானை வீட்டை அருகிலுள்ள பல்கலைக்கழகமொன்றிற்கு வழங்குமாறு கோரியே மாணவர்கள் அதனை கைப்பற்றியுள்ளதாகவும் அவர் கூறினார்.
பல்கலைக்கழக மாணவர்கள் நீண்டகாலமாக விடுதி வசதி பற்றாக்குறை மற்றும் இடப்பற்றாக்குறை பிரச்சினைகளை எதிர்கொண்டு வருவதாகவும், அவர்களின் பிரச்சினைகளுக்கும் தீர்வு வழங்கப்பட வேண்டியது அவசியம் எனவும் குறிப்பிட்டார்.
அதனால் மாணவர்களுடன் மோதலுக்கு செல்லாமல், இந்த பிரச்சினையை அமைதியான முறையில் தீர்க்கவே அரசாங்கம் முயற்சி செய்து வருவதாக தெரிவித்தார்.
இதனுடன், எதிர்க்கட்சிகள் இவ்வாறான சம்பவங்களை பயன்படுத்தி அரசாங்கத்திற்கு எதிராக அரசியல் பிரசாரம் மேற்கொண்டு வருவதாகவும் அவர் குற்றஞ்சாட்டினார்.
நாட்டின் சட்டம் அனைவருக்கும் சமமானது என்றும், ஜனாதிபதியும் அதனை தெளிவாக கூறியுள்ளதாகவும் அவர் தெரிவித்தார்.
தேவை ஏற்பட்டால் நிலக்கரி கொள்வனவு தொடர்பான ஜனாதிபதி விசாரணை ஆணைக்குழு அல்லது கொள்கலன் விடுவிப்பு தொடர்பான விசாரணைக் குழுவிற்கு முன்பாக சாட்சி வழங்க ஜனாதிபதியும் தயங்கமாட்டார் என்றும் அவர் குறிப்பிட்டார்.
மேலும், எதிர்க்கட்சிகளின் குறுகிய அரசியல் நோக்கங்களுக்கு அரசாங்கம் அடிபணியப்போவதில்லை என்றும், சட்டத்தின் முன் அனைவரும் கீழ்ப்படிவோம் என்றும் தெரிவித்தார்.
நிலக்கரி கொள்வனவு அல்லது கொள்கலன் விடுவிப்பு தொடர்பில் ஏதேனும் பிரச்சினைகள் இருப்பின், அவற்றை பொய்யான பிரசாரங்களால் அல்லாது சம்பந்தப்பட்ட விசாரணைக் குழுக்களிடம் முன்வைக்க வேண்டும் என்றும் அவர் வலியுறுத்தினார்.
