சம்பளத்துடன் பதவி இடைநீக்கம் செய்யப்பட்ட சாரதிகள் தொடர்பில் அமைச்சுசார் ஆலோசனைக் குழுவில் கவனம்

போக்குவரத்து, நெடுஞ்சாலைகள் மற்றும் நகர அபிவிருத்தி அலுவல்கள் தொடர்பான அமைச்சுசார் ஆலோசனைக் குழுக் கூட்டத்தில், சம்பளத்துடன் பதவி இடைநீக்கம் செய்யப்பட்ட சாரதிகள் தொடர்பான விடயம் விரிவாக ஆராயப்பட்டது.

இந்தக் கூட்டம், போக்குவரத்து, நெடுஞ்சாலைகள் மற்றும் நகர அபிவிருத்தி அமைச்சர் பிமல் ரத்னாயக்க தலைமையில் நடைபெற்றது.

கூட்டத்தில் அதிகாரிகள் தெரிவிக்கையில், பல்வேறு ஒழுக்காற்று குற்றச்சாட்டுகள் காரணமாக சுமார் 400 முதல் 500 சாரதிகள் வரை பணியிடை நீக்கம் செய்யப்பட்டுள்ளனர். இவர்களில் சிலர் தனியார் துறைகளில், குறிப்பாக தனியார் பேருந்து சாரதிகளாக பணியாற்றி வருமானம் ஈட்டி வருகின்றனர் என்றும் குறிப்பிடப்பட்டது.

அதேவேளை, பல்வேறு சட்ட ஏற்பாடுகள் மற்றும் நீதிமன்ற உத்தரவுகளின் அடிப்படையில், பணியிடைநீக்கம் செய்யப்பட்ட சிலருக்கு தொடர்ந்து சம்பளம் வழங்க வேண்டிய நிலை இருப்பதாகவும் அதிகாரிகள் சுட்டிக்காட்டினர்.

இந்த விடயம் தொடர்பில் நீண்ட நேரம் கலந்துரையாடப்பட்ட நிலையில், தேவையான சட்ட ஆலோசனைகளை உடனடியாகப் பெறுமாறும், ஒழுக்காற்று நடவடிக்கைகள் மேற்கொள்ளப்படும் நடைமுறைகளை மறுபரிசீலனை செய்யுமாறும் அமைச்சர் அதிகாரிகளுக்கு அறிவுறுத்தினார்.

மேலும், போக்குவரத்துத் துறையுடன் தொடர்புடைய சட்ட கட்டமைப்புகளை வலுப்படுத்துவதற்காக நியமிக்கப்பட்ட உபகுழுவின் அறிக்கையும், புகையிரத திணைக்களத்தை திறமையான மற்றும் தரமான சேவைகளை வழங்கும் நிறுவனமாக மாற்றுவதற்கான உபகுழுவின் இடைக்கால அறிக்கையும் கூட்டத்தில் சமர்ப்பிக்கப்பட்டன.

நாட்டின் பல்வேறு பகுதிகளில் போக்குவரத்து, நெடுஞ்சாலைகள் மற்றும் நகர அபிவிருத்தித் துறைகளில் காணப்படும் பிரச்சினைகள் குறித்தும் பாராளுமன்ற உறுப்பினர்கள் கவனம் செலுத்தினர். அவை தொடர்பாக உரிய நடவடிக்கைகளை எடுக்குமாறு அமைச்சர் அதிகாரிகளுக்கு பணிப்புரை வழங்கினார்.

இந்தக் கூட்டத்தில்:

• பிரதித் தவிசாளர் ஹேமாலி வீரசேகர
• பிரதி அமைச்சர்கள் எரங்க குணசேகர மற்றும் டாக்டர் பிரசன்ன குணசேன
• பாராளுமன்ற உறுப்பினர்கள்
• போக்குவரத்து, நெடுஞ்சாலைகள் மற்றும் நகர அபிவிருத்தி அமைச்சின் அதிகாரிகள்

உள்ளிட்ட பலர் கலந்து கொண்டனர்.