மே 15 முதல் இலங்கையில் PayPal சேவை ஆரம்பமா?
இலங்கையின் தேசிய தொலைக்காட்சி வலையமைப்பான ரூபவாஹினி கூட்டுத்தாபனம் வெளியிட்ட தகவலின்படி, உலகப் புகழ்பெற்ற ஆன்லைன் பணப் பரிவர்த்தனை சேவையான PayPal எதிர்வரும் மே 15ஆம் திகதி முதல் இலங்கையில் தனது சேவைகளை அதிகாரப்பூர்வமாக ஆரம்பிக்கவுள்ளதாக தெரிவிக்கப்பட்டுள்ளது. எனினும், இதுவரை நிறுவனத்தினாலும் அல்லது உள்ளூர் அதிகாரிகளினாலும் உத்தியோகபூர்வ அறிவிப்பு வெளியிடப்படவில்லை.
இந்த சேவையை அறிமுகப்படுத்துவது தொடர்பாக PayPal நிறுவன அதிகாரிகள் கடந்த மாதம் இலங்கைக்கு விஜயம் செய்து, உள்ளூர் தரப்புகளுடன் கலந்துரையாடல்கள் நடத்தியதாக தகவல்கள் தெரிவிக்கின்றன.
இந்த தகவல் வெளியாகியதையடுத்து, இலங்கையில் உள்ள ஃப்ரீலான்சர்கள், டிஜிட்டல் தொழில்முனைவோர் மற்றும் ஆன்லைன் வணிகங்களில் ஈடுபட்டுள்ளவர்களிடையே பெரும் எதிர்பார்ப்பு உருவாகியுள்ளது.
பல ஆண்டுகளாக இலங்கையர்கள் PayPal ஊடாக பணம் செலுத்தும் வசதியைப் பயன்படுத்தி வந்தாலும், வெளிநாடுகளிலிருந்து நேரடியாக பணத்தை உள்ளூர் கணக்குகளுக்கு பெறும் வசதி கட்டுப்படுத்தப்பட்டிருந்தது.
ரூபவாஹினி வெளியிட்ட தகவலின்படி, இந்த சேவை மே 15ஆம் திகதி முதல் ஆரம்பமாகும் என எதிர்பார்க்கப்படுகின்றது. இருப்பினும், சேவையின் துல்லியமான ஆரம்ப திகதி மற்றும் அதன் செயல்பாட்டு வரம்புகள் தொடர்பில் இதுவரை அதிகாரப்பூர்வ விளக்கங்கள் வெளியிடப்படவில்லை.
மேலும், PayPal நிறுவனம், இலங்கை மத்திய வங்கி அல்லது அரசாங்கம் இதுகுறித்து இதுவரை எந்த உத்தியோகபூர்வ அறிக்கையையும் வெளியிடவில்லை.
