மெரிட் அடிப்படையிலான பல்கலைக்கழக நுழைவை அதிகரிக்க ஆளுநர் வலியுறுத்தல்

நா. வேதநாயகன், வடக்கு மாகாணத்தில் மெரிட் அடிப்படையிலான பல்கலைக்கழக நுழைவு எண்ணிக்கையை மேலும் அதிகரிக்கத் தீவிர கவனம் செலுத்த வேண்டும் என வலியுறுத்தினார்.

அனைத்து பரீட்சார்த்திகளிடமிருந்து பல்கலைக்கழக நுழைவுச் சதவீதத்தில் தேசிய ரீதியில் முதலிடத்தைப் பெற்றுள்ள வடக்கு மாகாணம், அந்த நிலையைத் தக்கவைப்பதோடு மட்டுமல்லாமல் மேலும் மேம்படுத்த வேண்டும் என்றும் அவர் குறிப்பிட்டார்.

வடக்கு மாகாண கல்வி, பண்பாட்டலுவல்கள், விளையாட்டுத்துறை மற்றும் இளைஞர் விவகார அமைச்சின் மாதாந்த முன்னேற்ற மீளாய்வுக் கூட்டம் ஆளுநரின் தலைமையில் நடைபெற்றபோது இவ்விடயம் வலியுறுத்தப்பட்டது.

இந்தக் கூட்டத்தில், அமைச்சு மற்றும் அதன் கீழ் செயல்படும் கல்வி, விளையாட்டு மற்றும் பண்பாட்டுத் திணைக்களங்களின் திட்ட முன்னேற்றங்கள் விரிவாக ஆய்வு செய்யப்பட்டன. மேலும் மத்திய கல்வி அமைச்சின் ஊடாக வடக்கு மாகாண தேசியப் பாடசாலைகளில் முன்னெடுக்கப்படும் வேலைத்திட்டங்களின் தற்போதைய நிலையும் ஆராயப்பட்டது.

மாகாணம் முழுவதும் ஆசிரியர் பற்றாக்குறையை சமநிலைப்படுத்தும் நோக்கில் புதிய ஆசிரியர் இடமாற்றக் கொள்கைக்கு ஆளுநர் விசேட கவனம் செலுத்தினார். இந்தக் கொள்கை தொடர்பாக ஆசிரியர் தொழிற்சங்கங்களுடன் விரைவில் கலந்துரையாடி, அடுத்த ஆண்டிலிருந்து புதிய முறையில் இடமாற்றங்களை அமல்படுத்த நடவடிக்கை எடுக்குமாறு அவர் அதிகாரிகளை பணித்தார்.

அதேவேளை, ஆசிரியர்கள் மற்றும் அதிபர்களின் தனிப்பட்ட கோவைகள் காலதாமதமின்றி இற்றைப்படுத்தப்பட வேண்டும் என்றும், நிலுவையில் உள்ள விசாரணைகள் காரணமாக ஓய்வூதிய வழங்கலில் தாமதம் ஏற்படாத வகையில் அவற்றை விரைவாக முடிக்க வேண்டும் என்றும் அவர் வலியுறுத்தினார்.

மேலும், உயர்தர மாணவர்களுக்கான பாடப்பிரிவுகள் உரிய காலத்தில் முடிக்கப்படாதது முக்கிய சவாலாக சுட்டிக்காட்டப்பட்டது. பாடத்திட்டங்களை நேரத்திற்கு பூர்த்தி செய்தல் மற்றும் இறுதிக்கட்டத் தேர்வு பெறுபேறுகளுடன் ‘Z’ புள்ளிகளை வெளியிடுதல் மூலம் கல்வி அடைவு மட்டத்தை உயர்த்த முடியும் எனவும் அவர் நம்பிக்கை தெரிவித்தார்.

இதற்கான தொடர் நடவடிக்கைகளை மேற்கொள்ள கல்வி அதிகாரிகளுக்கு ஆளுநர் பணிப்புரை வழங்கினார்.