இலங்கையின் நிதி அமைச்சகத்தின் கணினி அமைப்பை குறிவைத்து நடத்தப்பட்ட சைபர் தாக்குதலில், 2.5 மில்லியன் அமெரிக்க டொலர் பணம் திருடப்பட்டுள்ளதாக தகவல் வெளியாகியுள்ளது. இது அரச நிறுவனத்தில் நடந்த மிகப்பெரிய சைபர் பணமோசடியாகக் கருதப்படுகிறது.
இந்த தாக்குதல் குறிப்பாக Public Debt Management Office (PDMO)-ஐ குறிவைத்துள்ளது. அமைச்சகத்தின் மின்னஞ்சல் அமைப்பில் ஏற்பட்ட சந்தேகத்திற்கிடமான செயல்பாடுகளைத் தொடர்ந்து மேற்கொள்ளப்பட்ட விசாரணையில் இந்த மோசடி கண்டறியப்பட்டது.
இந்த பணம் ஆஸ்திரேலியாவுக்கு செலுத்தப்பட வேண்டிய கடன் தொகையாக இருந்ததாகவும் தெரிவிக்கப்பட்டுள்ளது.
நிதி அமைச்சின் செயலாளர் Harshana Suriyapperuma இந்த சம்பவத்தை உறுதிப்படுத்தியதுடன், சம்பவத்துடன் தொடர்புடைய நான்கு மூத்த அதிகாரிகள் இடைநீக்கம் செய்யப்பட்டுள்ளனர்.
விசாரணைகள் மற்றும் சர்வதேச உதவி
Criminal Investigation Department இந்த சம்பவம் குறித்து விசாரணைகளை முன்னெடுத்து வருவதுடன், வெளிநாட்டு சட்ட அமலாக்க அமைப்புகளின் உதவியும் கோரப்பட்டுள்ளது.
ஆஸ்திரேலியாவின் உயர்ஸ்தானிகர் Matthew Duckworth, பண பரிமாற்றத்தில் ஏற்பட்ட தவறுகளை கவனித்ததாகவும், இலங்கை அதிகாரிகளுடன் இணைந்து விசாரணைக்கு உதவி வழங்கி வருவதாகவும் தெரிவித்துள்ளார்.
பின்னணி
2022ஆம் ஆண்டு பொருளாதார நெருக்கடியிலிருந்து மீண்டு வர முயலும் நிலையில் இந்த தாக்குதல் இடம்பெற்றுள்ளது. அப்போது இலங்கை சுமார் 46 பில்லியன் டொலர் வெளிநாட்டு கடனைத் திருப்பிச் செலுத்த முடியாமல் தவறியிருந்தது.
PDMO அமைப்பு சமீபத்தில் உருவாக்கப்பட்டதாகவும், இது International Monetary Fund ஆதரவுடன் கிடைத்த 2.9 பில்லியன் டொலர் நிதி உதவி திட்டத்தின் ஒரு பகுதியாக உருவாக்கப்பட்டதாகவும் குறிப்பிடப்பட்டுள்ளது.
முன்னதாக மக்களை சைபர் மோசடிகளில் இருந்து எச்சரித்த அரசாங்கமே இப்போது இத்தகைய தாக்குதலுக்கு இலக்காகியிருப்பது கவலைக்குரியதாக பார்க்கப்படுகிறது.
