விஜயின் தேர்தல் வெற்றி குறித்து இலங்கை நாடாளுமன்றத்தில் நகைச்சுவை விமர்சனம்

தமிழக சட்டமன்றத் தேர்தலில் நடிகர்-அரசியல்வாதி விஜய் தலைமையிலான தமிழக வெற்றிக் கழகம் (TVK) வெற்றி பெற்றதாக தகவல்கள் வெளியாகியுள்ளன. இதனைத் தொடர்ந்து, அவர் நாளைய தினம் தமிழக முதலமைச்சராக பதவியேற்கவுள்ளதாகவும் தெரிவிக்கப்பட்டுள்ளது.

இந்த வெற்றியைத் தொடர்ந்து இலங்கை அரசியல் வட்டாரங்களிலும் பல்வேறு கருத்துக்கள் எழுந்துள்ளன. சில இலங்கை நாடாளுமன்ற உறுப்பினர்கள் விஜய்க்கு வாழ்த்துகளை தெரிவித்துள்ள நிலையில், மற்றவர்கள் அவரது தேர்தல் வாக்குறுதிகள் குறித்து விமர்சனங்களையும் முன்வைத்துள்ளனர்.

இன்று நடைபெற்ற இலங்கை நாடாளுமன்ற அமர்வில் உரையாற்றிய உறுப்பினர் சாமர சம்பத், விஜயின் தேர்தல் பிரசாரத்தையும் குறிப்பாக “கச்சத்தீவை மீட்போம்” என்ற அவரது வாக்குறுதியையும் விமர்சித்தார்.

அவர் நகைச்சுவையாக கருத்து தெரிவிக்கையில், “கச்சத்தீவை மீட்போம் என்று கூறி மக்கள் வாக்குகளை பெற்ற விஜய், நாளை அல்லது நாளை மறுதினம் கச்சத்தீவையும் எடுத்துச் செல்வாரோ தெரியவில்லை” என கூறினார்.

மேலும், இந்தியாவின் முன்னாள் பிரதமர் இந்திரா காந்தியின் காலத்தில் கச்சத்தீவு ஒப்பந்தம் நடைபெற்றதை நினைவுகூர்ந்தும் அவர் கருத்து தெரிவித்தார்.

இந்த கருத்துக்கள் தற்போது இலங்கை மற்றும் தமிழ்நாடு அரசியல் வட்டாரங்களில் பரவலான விவாதங்களை ஏற்படுத்தியுள்ளன.