அமெரிக்க கடவுச்சீட்டில் டொனால்ட் டிரம்ப் உருவம் சேர்க்கப்படுமா? – சர்வதேச ஊடகங்கள் தகவல்

அமெரிக்க கடவுச்சீட்டுகளில் Donald Trump அவர்களின் உருவத்தை இணைக்க தீர்மானிக்கப்பட்டுள்ளதாக வெளிநாட்டு ஊடகங்கள் செய்தி வெளியிட்டுள்ளன.

United States Department of State வெளியிட்டதாக கூறப்படும் அறிக்கையின்படி, அமெரிக்க சுதந்திரப் பிரகடனத்தின் 250ஆம் ஆண்டு விழாவை முன்னிட்டு, ஜூலை மாதத்தில் புதிய வடிவமைப்பில் கடவுச்சீட்டுகள் வெளியிடப்படவுள்ளதாக தகவல் வெளியாகியுள்ளது. இதனை வெளியுறவுத்துறையின் செய்தித் தொடர்பாளர் Tommy Pigott தெரிவித்துள்ளார் என சர்வதேச ஊடகங்கள் குறிப்பிட்டுள்ளன.

இந்த புதிய கடவுச்சீட்டுகளில் கலைப்படைப்புகள் மற்றும் மேம்படுத்தப்பட்ட படங்கள் இடம்பெறும் என்றும், அமெரிக்க கடவுச்சீட்டு “உலகின் மிகவும் பாதுகாப்பான ஆவணங்களில் ஒன்று” எனவும் தெரிவிக்கப்பட்டுள்ளது.

மேலும், கடவுச்சீட்டின் உள் அட்டையில் அமெரிக்க சுதந்திரப் பிரகடனத்தின் வாசகங்களுடன், அமெரிக்கக் கொடியைச் சுற்றி டொனால்ட் டிரம்ப் அவர்களின் புகைப்படம் இடம்பெறும் என்றும், அவரின் கையொப்பம் தங்க நிறத்தில் பொறிக்கப்படும் என்றும் தகவல்கள் தெரிவிக்கின்றன.

இந்த “வரலாற்றுச் சிறப்புமிக்க நிகழ்வை” முன்னிட்டு குறைந்த எண்ணிக்கையிலான கடவுச்சீட்டுகள் மட்டுமே வெளியிடப்படவுள்ளதாகவும், ஆனால் அதன் சரியான எண்ணிக்கை இதுவரை உறுதிப்படுத்தப்படவில்லை என்றும் குறிப்பிடப்பட்டுள்ளது.

ஜனநாயக நாடுகளில் பதவியில் இருக்கும் தலைவரின் உருவம் கடவுச்சீட்டில் இடம்பெறுவது மிகவும் அரிதானது என்பதால், இது முக்கியமான மற்றும் வரலாற்று சிறப்பு மிக்க மாற்றமாக கருதப்படுகின்றது.